| Scritto da La Patrie dal Friûl,
19-01-2010 12:28
|
Pubblicato in : News, Marilenghe |
Dut si siere in pôcs minûts: miere ore dal prin timp e Zapata al fâs fal in aree su Dzemaili e rigôr; sul discut Amoroso, ma un salt di gjat di super Handanovic al permet al Udin di tignî la paritât. Al passe dome cualchi minût e simpri super Handanovic al tire cu lis mans la bale a Sanchez dilà de metât cjamp, corse dal cilen viers la aree e al ven tirât jù di Galloppa: ros sec par fal di ultin om. L’Udin al pues gjoldi di un zuiadôr di plui par passe une ore ma a la fin, dome fruçons.
E sì, parcè che un pôc pe condizion atletiche inmò no buine, un pôc pe confusion tatiche che disarmante, i furlans no rivin cuasi mai a fâ valê il vantaç numeric, di râr a saltin l’om e dome in pocjis ocasions si presentin te aree avversarie. La mancjance di un diretôr di orchestre si fâs sintî, a mancjin ideiis, gambiaments di ritmi, ognidun al fâs il so tic cence coralitât. E ven fûr cualchi zuiade sporadiche nassude plui de individualitât che di un dissen tatic planificât.
Nancje il secont timp al regale grandis emozions, il nervosisim in cjamp le fâs di paron e forsit al è il sintom di dôs scuadris che a vivin un moment di dificoltât. Si è viodût pardabon pôc biel zûc e di bande blancjenere diviers elements a rindin mancul di ce che si spietisi; l’Udin cun snait di metât 2009 al è aromai dome un lontan ricuart e al sarà dificil tornâ a viodilu in curt. L’impegn nol è mancjât nancje cheste volte ma in serie A nol baste par vinci.
Dal sigûr ancje il Parme al à fat di dut par dâ discontinuitât e confusion al zûc, i emilians dopo de espulsion a àn pensât plui a disfâ che a fâ, dut câs rivant a cori une vore pôcs pericui e in cualchi câs ancje a tornâ a partî. Nancje i inseriments di De Biase, che al à finît la partide cun 4 pontis (Di Natale, Sanchez, Floro Flores e Corradi), a son rivâts a gambiâ il risultât; pîc moviment devant e pocjis ideis tal mieç dulà che D’Agostino nol è stât decisîf par puartâ a cjase i trê ponts.
No nus reste che vivi dì par dì sperant di viodi a tornâ a vinci l’Udin, magari cuntune buine prestazion. Dome un non par vuê: Samir Handanovic, straordenari. Che la zebrute di aur e puartedi fortune?
|
|
|
News 
