Associazione Udinese Club

O sin aromai puartâts lis che a vuelin lis aghis, il timon al è scjampât des mans dal condotîr, e il naufragji al somee inevitabil. Il burlaç al è simpri plui dongje e il prossim at al podarès jessi che si stachin i prins tocs de nâf. Nol è l’inizi di un cine di aventure par mâr ma la situazion di cumò di un Udin cence avignî cuntun alenadôr, che ancje se cuntun non “marin”, al à pierdût dal dut la bussule. Noaltris sportîfs furlans o sin aromai cence peraulis, disorientâts di front di une gjestion strambe de societât e cuntun progjet sportîf che o viodìn simpri plui fumôs.

Inutil fevelâ di un incuintri che al risulte jessi dome l’ultin disastri di une squadre cence plui ni cjâf ni cjavece, cence stimui, cence anime e no dome par responsabilitâts dal tecnic. Lis colpis, si sa, no son mai dome di une bande e la anime di cheste squadre e je forsit il risultât di une programazion li che il progjet sportîf nol è plui in prin plan come che al varès. Masse declarazions, masse erôrs, ancje te comunicazion tra societât, zuiadôrs, media e ancje tifôs. Lis esternazions in setemane di Paron Pozzo viers Di Natale, la rispueste e il tornâ indaûr a son un esempli.

Nô tifôs o restìn simpri tal nestri puest, simpri pronts a sostignî scuadre e societât, ma no podìn rinunciâ a esprimi la nestre grande delusion par une stagjon che si presente scure e plene di pericui. Al covente pardabon un segnâl fuart, ma no dome, al covente di tornâ a viodi l’Udin (scuadre e societât) tornât a jessi chel ricognossût di ducj come esempli di zûc e gjestion, di profit e eficacie.

E je fuarte la pôre che lis colpis a finissin, come il mâl comun, par jessi consideradis responsabilitât di nessun e il continuâ di cheste staticitât tal risolvi il probleme no fâs che ingredeâ lis robis. Cheste e je la cause principâl de prestazion cuintri dal Siena. Ancje sul Titanic, intant che il transatlantic al leve sot, la orchestre e continuave a sunâ fint a la fin… ma lis conseguencis a forin disastrosis.

Valutazione utenti

Visualizza 2 di 2 commenti