Associazione Udinese Club

Viodìn di intindisi, la vitorie di vuê dopomisdì no je mert dome dai atacants dal Udin, la rêt numar 10 dal nestri cjapitani in campionât e la splendide realizazion aeree di un Floro Flores, di gnûf protagonist, mi à sugjerît un titul “scolastic”. Dôs rêts cun firme di autôr a àn decidût l'anticip di cheste zornade di campionât. Dôs realizazions entusiasmantis e forsit che a parin vie la crisi. Il mert de vitorie al va però, secont me, une voie tornade a cjatâ e a une tristerie agonistiche che tai ultins timps no jere plui dai blancs e neri. Che lis polemichis chest colp a vedin conventât a scjassâ il grup?

No podarìn mai savêlu. Sta di fat che la scuadre vuê e à dimostrât determinazion e ancje chel tic di fortune di plui... che in Friûl al mancjave di timp. Il malât al pues ritignîsi su la vie dal vuarî, ancje se si à di mantignî alte la vuardie par evitâ di tornâ a colâ. I antibiotics a varan di jessi ancjemò une volte la voie di fâ grup e la capacitât dal alenadôr di evitâ che cualchidun, che al zuie di mancul, si sinti escludût o piês sotvalutât. Une sielte grande e di chest valôr e à di considerâsi simpri une risorse e mai un probleme.

La partide no je stade ecelente sul plan tatic, il fat che il Livorno al vedi vût plui tignude di bale dai blancs e neris le conte lungje. Dut câs no podìn judicâ negative la prestazion, ancje e soredut pal fat che dutis lis dôs scuadris a vevin une posizion critiche in classifiche e la voie di risultât e à condizionât cence dubi lis zuiadis. La splendide punizion di Di Natale (che se o paragoni a chês storichis di Zico no crôt di blestemâ), e à fat colâ la belence de bande blancje e nere e dal sigûr e à dât une direzion divierse a la partide.

Cussì i labronics si son viodût obleâts a vierzisi, lassant inevitabilmentri plui spazis al Udin che, a moments, al è rivât a imponi la sô manovre. Di une ripartence al è rivât il secont gôl furlan, un palegjâ “circens” di Totò e une circolazion di bale di manuâl, a àn metût Floro Flores tes contizions di dâi di cjâf tal mieç de aree. Pardabon une biele zuiade! Tal secont timp invezit, i ritmis a son lâts man a man al mancul e la reazion dai ospits no à gjenerât zuiadis particolarmentri pericolosis, se si gjave un tîr di Lucarelli in aree.

La vitorie e je duncje rivade e e je stade ancje mertade. La svolte invezit e sarà cuant che si rivarà a otignî une continuitât di risultâts e soredut cuant che ducj i atôrs sul cjamp a savaran esprimisi daûr di ce che si spietin societât e tifoserie. Pal moment un biel vôt metìnlu in cassefuart... il nestri obietîf al à però di jessi il 10 cun laude!

Valutazione utenti